ජනපතිවරණය ගැන ඔබෙන් ඉතිහාසය අසන ප්‍රශ්නයක්‌!
ඉතිහාසය යළි යළිත් වක්‍රාකාරව ගමන් කරන බව සත්‍යයකි. මෙය අපට මතක්‌ වන්නේ අද ද සිදුවෙමින් පවත්නා දේවල් දක්‌නාවිටය. විශේෂයෙන් මෙවර ජනාධිපතිවරණ තරගබිම දෙස බලන විට සිංහලයන්ගේ ඉතිහාසය වන මහාවංශයේ සඳහන් අතීත සිදුවීම් සිහියට නැඟෙයි. අද ප්‍රධාන අපේක්‌ෂකයන් වන ජනාධිපති මහින්ද රාජපක්ෂ මහතා සහ ජෙනරාල් සරත් ෆොන්සේකා මහතා යන දෙදෙනා තරගබිමේ සිට උණුසුම් අදහස්‌ හුවමාරු කර ගනිති. ජනාධිපති මහින්ද රාජපක්ෂ මේ රටටත් ජනතාවටත් පරිසරයටත් සතා සිව්පාවටත් තිස්‌ අවුරුද්දක්‌ තිස්‌සේ මහා විනාශයක්‌ කළ කොටි ත්‍රස්‌තවාදය සම්පූර්ණයෙන් විනාශ කොට ජනතාවට කිව නොහැකි තරමේ සහනයක්‌ ලබාදුන්, බෙදී තිබුණ මව්බිම නැවත එකට යාකරමින් එය නව සංවර්ධන මාර්ගයකට යොමු කළ වර්තමානයේ ජනප්‍රියත්වයේ ඉහළටම නැග ගත් නායකයාය.
ජෙනරාල්තුමා මහින්දගේ අනුමැතියෙන් හමුදාපතිකම ලබා ආරක්‍ෂක ලේකම් ගෝඨාභය රාජපක්ෂ මහතාගේ මහඟු යුද කළමනා කාරිත්වයත්, ගගන, නාවික හමුදාවල සෘජු දායකත්වයක්‌ නිසා යුද්ධය ජය කණුව වෙත මෙහෙයවූ නායකයා විය. මෙහි දී යුද්ධයේ සේනාධිනායකයා වූයේ මහින්ද රාජපක්ෂ ජනාධිපතිවරයාය. අවසාන අදියරේ මේ ත්‍රස්‌ත යුද්ධය ලෝක යුද්ධයක්‌ තරමටම ලෝක අවධානයට යොමු වූවක්‌ බවට පත් වූ නිසා කොටින්ට ආවඩන බටහිරයන්ගේ දැඩි බලපෑම් සහ විවිධ කොන්දේසිවලට මුහුණ දීමට සවිමත් පිටකොන්දක්‌ ඇතිව සිටි රාජපක්ෂ ජනාධිපති සමත්වීම රටේ වාසනාවක්‌ විය. කොටි නායකයන් බේරාගැනීමට සටන් විරාමයක්‌ සඳහා බලපෑම් කිරීමට වීරයන් ලෙස (අවි) අමෝරාගෙන ආ බ්‍රිතාන්‍ය විදේශ ඇමැති ඩේවිඩ් මිලිබෑන්ඩ් සහ ප්‍රංශ විදේශ ඇමැති බර්නාඩ් කුෂ්නර් ඇඹිලිපිටියේ චන්ද්‍රිකා වැවේ තාවුල්ලේ රුක්‌සෙවනට කැඳවා සාකච්ඡා පවත්වමින් කීවේ දැන් සටන් විරාමයකට ඉඩක්‌ නැති බවයි.
කොටි හිතවාදී මේ බටහිර බලවේගත් දේශීය කොටි හිතවාදීනුත් ජනාධිපතිගෙන් පිළිගැනීම සඳහා යොදාගත් හොඳම උපක්‍රමය වූයේ ඔහුගේම යුද හමුදා නායකයා ජනාධිපති තරගයට යොමු කරවීමයි. මේ අපේ ගම්වල ව්‍යවහාරයට අනුව ඌරගෙ මාලූ උරගේ පිටේම තියා කැපීම" වැනි ක්‍රියාවකි. ජනාධිපති ත්‍රස්‌ත යුද්ධය අවසන් කර ගැනීමට යෙදවූ යුද නිලධාරියා ලවාම ඔහු පැරද වීමට අවස්‌ථාව යොදා ගැනීම ඔවුන්ගේ අරමුණ වී ඇත. මෙය දැන් ඉතා තියුණු තරගයක්‌ බවට පත්ව ඇත.
මෙහිදී ඉතිහාසය ඔස්‌සේ අපේ මතකයට නැගෙන්නේ මෙයට අවුරුදු 2100 ගණනකට පෙර ද්‍රවිඩ ආක්‍රමණිකයන්ට මුහුණදුන් වළගම්බා රජු හා සම්බන්ධ සිදුවීමකි. දුටුගැමුණු රජුගේ ද මුනුබුරකු වූ වළගම්බා රජ ද්‍රවිඩ සතුරන්ගෙන් බේරීම සඳහා පැනගොස්‌ වනගත ප්‍රදේශයන්හි අවුරුදු දාහතරක්‌ පමණ කාලය ගත කළේය. ඒ කාලය තුළ ඔහුට උදව් කළේ බෞද්ධ භික්‍ෂුහුය. මෙහිදී තිස්‌ස නම් තෙරුන් වහන්සේ තමන් දන්නා තනසීව නම් ගම් ප්‍රධානියාට රජු සහ ඒ පිරිස භාරකොට ආරක්‍ෂාවත් ආහාර පාන ආදී පහසුවත් සලසා දුන්නේය. මෙසේ කල් ගත කරන රජු කුම්භීලක නම් තෙරුන් වාසය කළ වලස්‌ගල විහාරයේ බුද්ධ පූජා පින්කමක්‌ කිරීමට සූදානම් කරවීය. රජු සමග සිටි ඇමැතිවරු රජු විහාරයට එන්නට පෙර විහාර මලුව පිරිසිදු කිරීම සඳහා එම ආකාසෙච්තියාංගනයට නැංගාහ. එය පිsරිසිදු කර නිමවා ඇමැතිවරුන් පහළට එන්නට ප්‍රථම රජු සහ දේවිය අහස්‌ චෛත්‍ය පියගැටපෙළ නගිමින් සිටියහ. එම පඩිපෙළ දිගේම පහළට බසිමින් සිටි ඇමැතිවරුන්ට පහළට බස්‌නා අන්මගක්‌ නොවූයෙන් බැසීම නවතා රජුට ගෞරව වශයෙන් එහිම අයිනකට වී වාඩිගත්හ. එසේ හිඳසිටි අටදෙනාගෙන් "කපිසීස" නම් ප්‍රධාන ඇමැතියා දැක වාඩිවී සිටියා නොවේදැයි කිපී ඔහු මැරවීය. මෙතරම් කුඩා වරදකට අපගේ ප්‍රධාන යෝධයා මරාදැමීම ගැන කලකිරීමට පත් ඉතිරි ඇමැතියන් සත්දෙනා රජු අතහැර දමා යන්නට ගියහ. එසේ යන අතර මගදී මංපහරන සොරුන් විසින් ඔවුන් ළඟ තිබූ වස්‌ත්‍ර ඇතුළු බොහෝදේ පැහැර ගනු ලැබූහ. එනිසා කොළ අතු හැඳගත් මේ සයදෙනා අතර මග හම්බුගල්ල විහාරයට ගොස්‌ තිස්‌ස තෙරුන් වහන්සේ හමුවූqහ.
ඔවුන්ගෙන් තොරතුරු විචාළ තෙරහු තමන්ට ලැබී තිබුණු වස්‌ත්‍ර, තෙල්, හාල් ආදියෙන් ඔවුන්ට සංග්‍රහ කළහ. ආහාර ගෙන විඩා දුරු කර ගැනීමෙන් පසු ඇමැතියන්ගෙන් තොරතුරු විචාල තෙරුන් වහන්සේ දැන් තෙපි කොයි යවුදැයි විචාළහ. එවිට ඔවුහු සියලූ තොරතුරු නොඅඩුව ප්‍රකාශ කළහ. එවිට තිස්‌ස තෙරුන් වහන්සේ සම්බුදු සසුනටත් රටටත් ආදරය කරන මේ යෝධයන්ගේම උපකාරයෙන් බලය ලබාගෙන මේ රජුටම රටත් සම්බුද්ධ ශාසනයත් දියුණු කළ හැකි යෑයි සිතා මොවුන් නැවත රජු සමග එක් කිරීමට අදහස්‌ කොට ඔවුන්ගෙන් මේ ප්‍රශ්නය ඇසීය.
රටත් සම්බුද්ධ ශාසනයත් නඟා සිටුවීම කළ හැක්‌කේ දමිළ ආක්‍රමණිකයන් සමග එකතුව කටයුතු කිරීමෙන්ද? නැතහොත් රජු සමග එකතුවීමෙන්ද?
"ස්‌වාමීනි, රජු සමග එකතුවීමෙන් රටත් බුදු සසුනත් දියුණු කළ හැකිය" මෙසේ ඔවුන්ගේ අදහස්‌ දැන ගැනීමෙන් පසු තිස්‌ස තෙරුන් වහන්සේ ඇමැතිවරුන් නැවත රජු වෙත කැඳවාගෙන ගොස්‌ කරුණු කියා මිත්‍ර කරවීමෙන් රජු ශක්‌තිමත් කරවීය. ඉන් ටික කලකට පසු වළගම්බා රජ සේනා රැස්‌කොට ගෙන අනුරාධ පුරයට පැමිණ සටන් මෙහෙයවා ද්‍රවිඩ ආක්‍රමණිකයන් ජයගෙන සම්බුද්ධශාසනයත් රටත් නඟාලීය.
ඒ අවුරුදු දෙදහස්‌ එකසිය ගණනකට පෙර හම්බුගල්ල විහාරයේ තිස්‌ස තෙරුන් වහන්සේ ඇසූ ප්‍රශ්නයම අපි අද ශ්‍රී ලංකාවාසී ජනතාවගෙන් මෙසේ අසමු.
"බෙදුම්වාදී උවදුර මුලිනුපුටා දමා මේ රට නඟාලිය හැක්‌කේ සතළිස්‌ අවුරුද්දක දේශපාලන පළපුරුද්දක්‌ ඇති ජනාධිපති මහින්ද රාජපක්ෂ බලයට පත් කිරීමෙන්ද? නැතහොත්
"හතළිස්‌ දවසක දේශපාලන පළපුරුද්දක්‌ පමණක්‌ ඇති "ජනරාල්තුමා බලයට පත් කිරීමෙන්ද"?
යන්න මෙරට ජනතාව ඉතා මැදහත්ව සහ කෘතඥතාපූර්වකව කල්පනා කර බලා තීරණය කළ යුතුව ඇත.
විජයසිරි වෙත්තමුනි
