දෙමළ සන්ධානයේ ඉල්ලීම් වැඩි ප්‍රමාණයකට
ජෙනරාල් එකඟතාව පළ කරයි....
උතුර - නැගෙනහිර අධි ආරක්‍ෂිත කලාප සියල්ල ඉවත් කිරීම එහි ආරක්‍ෂක හමුදා කඳවුරු ප්‍රමාණය අඩු කිරීම, අත්අඩංගුවට ගනු ලැබූ සහ භාර වූ කොටි සැකකරුවන් 12,000 ක්‌ දෙනා පොදු සමාව යටතේ නිදහස්‌ කිරීම ඇතුළු දෙමළ ජාතික සංධානය ඉදිරිපත් කළ ඉල්ලීම්වලින් වැඩි ප්‍රමාණයකට විපක්‍ෂයේ පොදු අපේක්‍ෂක ජෙනරාල් සරත් ෆොaන්සේකා එකඟතාව පළකර ඇතැයි වාර්තා වේ.
ජනාධිපතිවරණයට සහාය ලබා ගැනීමේ අරමුණින් දෙමළ ජාතික සන්ධානය හා සරත් ෆොන්සේකා මහතා අතර පෙරේදා රාත්‍රි්‍ර පැවැති සාකච්ඡාවේදී මෙම එකඟතාව පළ වු බව ඊයේ (22 දා) වීරකේසරි පුවත්පත වාර්තා කර තිබිණි.
මෙම සාකච්ඡාවට විපක්‍ෂය වෙනුවෙන් සරත් ෆොන්සේකා සමඟ විපක්‍ෂ නායක රනිල් වික්‍රමසිංහ ද සහභාගි විය. මෙම සාකච්ඡාවට ජවිපෙ නියෝජනය කරමින් කිසිවකුත් සහභාගි නොවූ බවත් වාර්තා වේ.
දෙමළ ජාතික සංධානය නියෝජනය කරමින් ආර්. සම්බන්ධන්, අරියනේත්ත්‍රන්, මාවයි සේනාධිරාජා, සුරේෂ් ප්‍රෙම්චන්ද්‍රන්, ගඡේන්ද්‍ර කුමාර් පොන්නම්බලම් යන මහත්වරුන් සහභාගි වූ අතර එම සාකච්ඡාව ඉතාමත් සාර්ථක බව සඳහන් කරන දෙමළ ජාතික සංධානයේ පාර්ලිමේන්තු කණ්‌ඩායම අද පෙරවරු 10.30 ට කොළඹදී රැස්‌වී සරත් ෆොන්සේකා මහතාට සහාය දීම පිළිබඳව සාකච්ඡා කරන බවද එම වාර්තාවේ සඳහන් වේ.
ජෙනරාල් සරත් ෆොන්සේකා මහතාට සහාය ලබාදීමට දෙමළ ජාතික සංධානය විසින් ඉදිරිපත් කරන ලද ඉල්ලීම් මෙසේය.
අත්අඩංගුවට ගෙන සහ භාර වූ කොටි සැකකරුවන් 12000 ක්‌ පමණ දෙනා පොදු සමාව යටතේ නිදහස්‌ කිරීම.
උතුරු නැගෙනහිර අධි ආරක්‍ෂිත කලාප සියල්ලක්‌ම ඉවත් කිරීම.
අධි ආරක්‍ෂිත කලාපවලින් ඉවත් කරන ලද පුද්ගලයන් සියලුම දෙනා ඒ භුමිය තුළ නැවත පදිංචි කරවීම.
උතුරු නැගෙනහිර ආරක්‍ෂක හමුදා කඳවුරු සංඛ්‍යාව අඩු කිරීම.
වාර්ගික අර්බුදයට දේශපාලන විසඳුමක්‌ ඉදිරිපත් කිරීම.
අවතැන් වූවන් කඩිනමින් නැවත පදිංචි කරවීම.
ඒ අයට අවශ්‍ය සියලු පහසුකම් සලසාදීම.
මේ ජනතාවට අවශ්‍ය නිවාස ඉදිකර දීම.
නැගෙනහිර පළාතේ සිදු කෙරෙන සැලසුම් සහගත පදිංචි කරවීම් නතර කිරීම.
